Hoihoi!

Zersch hani dä ganz Text do inä Mail gschribä, aber denn ischmir zmol in Sinn cho, dasmir jo än Blog hend. Drum hani ez aläs do inäkopiert - und ihr chömäz jo denn glich per Mail über :-)

I ha dä doodle ez mfall au usgfüllt, fählt nurno d Rita (und Janine, i nimm a du häsch afach Termin itreit wo dir passäd?). Nochär chömmer jo denn scho definitiv abmachä, juhuu!

He Julia da hani nöd gwüsst dasst hürotsch! Da sind jo ultimativi News :-) !!! GRATULIÄRÄ (seit mä da so??)! Und jo, Rorschacherberg stimmt (Lochstr. 8). Jupii mir freuäd üs scho uf d Iladig hihi! Am 8. Juli chumi zwor gad vom Lager hai, aber denn bini sicher guät gluunt und in Fäschtstimmig juhu!

He Riti tankä auno für d Chartä! Hani ganz vogässä zum sägä woni di adä Olma xeh ha... sorry. Aber dini langä Hoor hend mi voll abglenkt und drum hani gar nümä dratenkt :-) Aber wo sie cho isch hani mi u gfreut mfall! Isch glatt xi, i ha i dem halbä Johr siti do wohn ersch 3 Chartä übercho und dini am gliichä Tag wiä ä anderi! Bösä Zuäfall, nöd?

I wünsch eu ä schös Wuchänend und hoff dass mir üs bald mol xehnd! I wür eu suss bi eim Termin denn glich mol i üsi Wohnig zum Apéro iladä und nochär chöntämär näbä go ässä (z.B. bidä Riti dähai? Hihi...) - au wenn dä gögl da gad letschti gmacht hät. Aber do sind jo eh nöd ali däbii xi.

Gruäss Linda

Szene Openair

Hey Ladies
Also ich han äs super Openair ka. Schade bisch nöd au däbi gsi Julia. Du häsch üs gfählt!! I ha di so vermisst, das i öppe 3x gmeint ha i ha di irgendwo gseh ;-)
Also dä Philipp, dä Adi, d'Marina und ich hönd gescht nomol Vollgas geh. Irgendwie simmer so lasch druf gsi und dän han i di grandios Idee ka zum bi dä Habsburg Bar Caiprinhas trinke. Naja so noch am 3. simmer suuuper guet druf gsi und bi Gentleman abgange und dän hömmer kalts Bier brucht und sind grad no bis zum Schluss bliebe und hönd no Billy Talent glueget. Nochher hömmer no möse öppis ässe und zämepacke und dän is mega spot worde. I bi au völlig betrunke gsi und irgendwie zu gar nix meh fähig. Dän hät mi au wieder mini Verkältig agfange quäle und i ha würkli nöd gwüsst wie i dä hütig Tag söll überstoh. Aber irgendwie han is gschafft :-)

Und i ha scho än neue guete Vorschlag für üs :-)) Also am Openair han i äs Plakat gseh zum Szene Openair. I bi selb no nie gsi, aber glaub du Julia gäll??!! Uf jede Fall find i s'Programm ziemli guet und i hett würkli Lust zum go. S'isch sehr nöch vu dä Julia und mir. Mir könnted also au zu üs hei go schlofe und vu mir us au nur 1 Tag go. Also am Fritig 6. August kämt dä Bligg und nochher grad no Milow. Am Samstig 7. August kämt Blumentopf, Papa Roach (uf da bin i während minere krasse Punkphase so mit 14i gstande...hihi...) und dän no Adam Green (da kenn i nöd so guat aber ha scho ghört seg guet.) Und notürli no ganz anderi Sache, woni eifach nöd kenn. Tickets sind au nöd so tüür... Also falls ihr Lust und Ziit hönd luegeds eu doch uf dä Homepage mol a. I würd au Tickets bsorge...

I hoff eifach das i dän ume bi. Dä Philipp und ich gönd i dä letschte Wuche no spontan id Feri. Mir hönd aber nonig gross drüber gredet. I denk aber mir könnted sicher luege das mir dän wieder do sind falls öppert vu eu (oder am beschte alli) Ziit und Lust hetted zum mit mir go.

So Julchen... das wär min Vorschlag gsi zum üs wieder gseh. I bi aber notürlich au bi anderne Sache däbi. Danke fürs Sms und eu allne än schöne Obet. I leg jetzt mis bequeme Pischi a und hängs vor dä Fernseh go Fuessball luege und i glaub i ässe hüt no kli Schoggi :-) Tönt guet gäll??!!

lg Gögl

Halli Hallo

Mann, i ha au so ewig nümm bloggt. Aber mer gohts guet:) Bi i dä Früehligsferie no kli im Tessin gsi mit em Jo. Het üs richtig guet tue. Irgendwie lauft immer sooooooo viel, dass mer fast kei Ziet für üs hend.
Ah jo, hend er eigentlich mitüberko, dass i dür neue sozäge "halbgschwüstertie" ha und dcorin ez sozäge mini neu "cousine" isch?:) Do sind er ez scho kli ifersüchtig, gell??:) Aso, die neue Gschwüsterte sind nöd so kuul, defür dcousine umso me:)
und sus und so,hmmm, i dä Schuel laufts eigentlich guet. Ha kli demit zkämpfe, dass i ä paar würklich schwachi kind ha, aso es sind u lüübi, aber i ha immer kli mitleid, wills soviel müssted, wos so entwickligsmässig glob gar no nöd könd leiste,jojo,ha bald wieder eltergspröch, juhui:)
Und jetzt no kurz zu dä Offa: bi eigentlich nur eimol gsi, defür recht usgibig - aber i het scho erwartet, dass i mindestens öper vo eu am erdbeerwiistand treffe werd:)
@Linda: freut mi für eu, dass er ä wohnig gfunde hend! Da isch doch enig kuul, zäme so kli irichte! Mer hend üs gad au no neue Gartemöbel kauft und langsam bin i richtig guet im zämeschruube:)

So, freu mi uf Janins Party. Macheds guet!

Happy und voller Energie zurück

Halli Hallo
Also i bi guet wieder dihei ako und voller Energie wieder sofort in Bruefsalltag igstiege. S'isch unglaublich wie schnell mer wieder im Alltagsstress isch. Aber die Ziit isch eifach dä Hammer gsi!! I ha so viel gseh und erlebt und au sehr viel Energie mit hei gno. S'Wiederseh mit am Philipp isch eifach wunder wunder schön gsi. Mir hönds i volle Züge gnosse und hönd d'Händ nöd köne loh vunenand ;-) Au jetzt freu i mi jede Morge das er nebed mir liit und denn hüpf i voller Freud us am Bett. S'isch ächt krass. I ha so kei Müeh zum ufstoh. Und woni hei ko bi hett i jo söle müed si will im Flugzüg han i nöd köne schlofe und bi ewig lang greist. Aber irgendwie han i so ä Freud ka das i gar nöd müed gsi bi. Ha s'Gfühl ka i ha ihn jetzt so lang nöd gseh, do kan i nöd d'Auge zue mache... Aber am Mäntig Obet noch am schaffe isch denn d'Müedigkeit endlich mol wieder ko und i ha mol wieder ä Nacht richtig gschlofe. D'Nächt vorher hömmer meh anders gmacht als gschlofe ;-) Also mir hönd üs au viel zum verzelle ka gäll... Mini Kids hönd sich au gfreut das i wieder do bi und di kline Äugli hönd richtig glänzt am Mäntig Morge wos inegstürmt sind. Sie hönd mir soooo viel zum verzelle ka, das mir di erschte 2 Täg hauptsächlich am pläuderle gsi sind. Aber mir is grad recht gsi, will i bi kli näbed dä Schue gstande und mini Vorbereitige woni vor 7 Wuche oder so mol kurz gmacht ha sind naja nöd so dä Hammer gsi. Aber unterdesse han i s'Gfühl i bi wieder organisiert. Ha eifach än riese Berg Arbet vor mir. Aber i mach jetzt eifach eis noch am andere. Uf da bini übrigens voll Stolz. I nimms voll locker... Ha au mol eifach kli spontan unterrichtet und so und i glaub vormene Johr hett i da nöd köne und mi unnötig mega gstresst. Jetzt isch irgendwie alles voll easy. Und wän öppis nöd klappt, egal, dän gang i hei und dän isch dä Philipp döt und dän isch eh alles wieder guet :-)
A dä Janine ihrer Geburtstagsparty bin i sicher däbi und dä Philipp viellicht au. (Mue ihn nomol froge...) Wär suuuuper wän mir üs alli würded treffe. Aber i ha no än Vorschlag für äs zweits Treffe. Rhemaaaa :-) Wie könnts au anderscht si??!! Also falls öppert für dä Alass is Rhintal kunnt find i isch äs Pflicht mir und dä Julia Bscheid z'geh. Am Samstig gang i nöd so gern, wills mir dän immer kli z'viel Lüüt hät. Super isch immer dä 1. Fritig und am 2. han i au scho mit dä Niggi, minere Kollegin abgmacht. Also am 1. Fritig suech i sowiso no Begleitpersone und am 2. Fritig dürft mer sich mir und dä Niggi sehr gern aschlüsse. Unter dä Wuche gang i viellicht au mol, aber da isch dän eher kli spontan und halt nöd so wild... Also i würd mi über gmeinsames Partymache sehr freue :-)
lg

Geburtstagparty

He zämä

Mir sind würkli schlechti Bloggerinnä im Moment und no viel schlechteri "Trefferinne".
Wenn hemer üs eigentlich sletschtmol gseh? Glaub sallerletschte Treffe, wo alli gsi sind, isch letscht Herbst mol gsi. Oder sind nöd mol döt alli däbii gsi? Wär also unbedingt wieder mol Ziit! Wär cool, wenn viel a min Geburtstag cho chönntet. Aber wenn ihr kei Ziit hend, verstandi da natürlich, isch jo chli churzfristig gsi! Und falls äs a mim Geburi nöd klappt, denn müämer unbedingt wieder mol ä Datum finde. Ich mach notfalls sogar än Doodle =)

Ich bin jetz a dä Schuel im Endspurt, no ei Woche und denn hani au endlich Früähligsferiä! So spot erst... und noch zwei Woche Feriä muäni ganzi 2.5 Täg i dSchuel und denn isch wieder Uffahrt =) cool, oder? hihi Und denn gohts ab uf Rimini! Yippie!

He Linda, da findi mega cool, dass jetzt wieder ä eigeni Wohnig hesch. Mueni jo denn mol verbii cho go güxlä.

Glg
Janine

wiedermol än post... suss vergammlät üsän blog!

hoi zämä

läck mir hend scho lang nümä gschribä. mesind glaub im moment nözo guäti bloggerinnä :-)

hendihrs guät? sind ihr flissig adä offa? aso i bi glaub hüt nomi chli dötä, aber glaub nöd so grob. suss isch äbä vill anders los bimir... mol luägä.

hey mfall i ha züglät! dä raffi und i hend ä 3zimmer-wönigli im rorschacherberg, schö nöch vo dähai. äs isch aläs uu schnäll gangä, vor drü wuchä simmer d wonig go aluägä und vorärä wuchä hemmer chönä inä! am raffi sini eltärä kenäd äbä d vomiäterin und drum isch da aläs so schnäll gangä. jo und ez hani ä neui adressä: lochstr.8, 9404 rorschacherberg. ez bini di ganz wuchä (mini erscht feriäwuchä) flissig am usruumä und butzä und iiruumä und butzä xi und ez ischäs fertig. als belohnig hani mir gescht än neuä mäc (also kein laptop, sondern än richtigä desktop) kauft, juhuuu!!! leider ischs wiä immer mitäm internet ä huärä gschiss, drum chani ez dähai no nöd mailä und bloggä und so. i werd drum i nögschter zit nur sporadisch im internet si. aber üsäs wönigli isch u schö, mir hend au än gartä zum dussä chli sitzä und grillä und so. und i ha uuu freud, hett jo scho laang (wiedermol) gern ä eigäni wohnig! i hoff damol hebäz ächli länger, aber i tenk scho :-)

tankä janine für dini geburi-iladig! i luäg no obs üs passt, aber i glaub scho! i schrib dir denn no definitiv. wär vo eu mädels chunnt denn au? wär doch schö wemmir üs ali würäd treffä, ez wo au üsi weltäbummlerin denn wieder im land isch... würmi jedäfalls freuä.

i wünsch eu no ä guäti zit (oder no schöni feriä) und schribäd doch au wiedermol...

gruäss lindi

ui,armi janine. Wie hesch denn da gschafft?!
I ha ez gad mis Schuelzimmer fertig ufgrumt und freu mi ez uf ä gmüetlechi Feriewuche:)

Übrigens, sind er scho mol bi Lukas und Anina dahei gsi? I bi gsi (Gögl übrigens au) und isch jo voll krass, ä eeeeeenigi Hütte! Echt schö. I ha defür en neue Kleiderschrank:)

Jo also, weg üserm Treffe...hm...wär huere kuul,wenn mer üs wiedermol gseh würed.ha dhoffnig no nöd ufgeh,dass es irgendwenn wieder klappt...am 27. bin uf jedefall au debi.
macheds guet und dä janine ä gueti besserig!